第一場 《分產》 區氏：【長句花】我真安慰，我真安慰，幾十歲人守大兩個仔，兩房新抱亦娶齊，惟是大仔亞玉堂唔係我親生仔，所以時常考慮分家嘅問題，先夫剩下百萬家財，我想交由亞瑞堂佢承繼。 玉芳：（白：亞媽，亞大哥雖然唔係你親生，但係佢當你係親生老母一樣嘅，論起分身家，我認為要公平至係。） 區氏：（白：多咀！） 志芬：（白：亞三小姐，你同你二哥係同胞兄妹，點解你會手指拗出㗎，你唔出聲冇人話啞嘅 ，我以為你識趣嘅，就無謂參加分產嘅問題。） 區氏：（白：係囉！二家嫂講得真係啱）【花下句】亞芳你無容置喙，不準你亂說無稽，亞媽自有主張，今日何以不見亞瑞堂乖仔。（白：點解呢下。） 志芬：（白：係，佢話去咗飲晏晝茶㖞，都怕就翻嘅喇） 瑞堂：【胡姬怨】真真心翳，直落唔通不襟計，輸得真翳，可恨只貔貅威可畏，賣二開三，猛把人噬，點解長年運滯，面口似黃泥，回家出妙計（白：幾大都翻去趕注咋。） 區氏：（白：啊，乖仔，乜你飲完茶翻嚟喇咩） 瑞堂：（白：係啊媽） 區氏：（白：亞瑞堂，你千祈唔好再出街喇，因為亞媽想同你商量一件緊要嘅事體） 瑞堂：（白：乜嘢咁緊要事呀，我重約咗個朋友斟成單生意，趕住翻嚟同你攞五千銀去落定，交易之后便可回歸，俾五千銀我先喇媽） 區氏：（白：俾錢你啊？） 瑞堂：（白：係喇） 志芬：（白：唔好俾佢啫奶奶，聽日至落定唔得嘅咩，） 瑞堂：（白：咪聽佢講啦媽，做生意緊要呀嘛！） 志芬：（白：呢件事仲緊要過做生意啊）【長二王下句】你要聽我指揮，共你商量大計，今日企圖奪產，莫個一簣功虧，安人已成竹在胸，轉眼你把家財，承繼。 瑞堂：【花下句】呢趟無端端發達，唔理個大佬佢豆泥，提起分身家就格外精神，快啲叫亞哥出嚟將數計。 區氏：（白：亞玉芳，你快啲去叫玉堂出嚟） 玉芳：（白：哦！得喇）【花下句】怨娘親陰謀奪產，我實不值佢所為，待我喑向叔父通知，等佢把公道主持，破壞佢哋陰謀不軌。 瑞堂：（白：亞媽，個盤假數預備好嗮啦嘛？顧住俾亞哥抽秤啵） 區氏：（白：唔會嘅） 志芬：（白：你擔心少樣都得囉）【花下句】我與安人早為準備，又焉可提出分產問題，你大可以安枕無憂，你豈不知我工於心計。 區氏：（白：係囉，我同亞二家嫂搞掂嗮嘅喇瑞堂，你放心都得嘅啦） 瑞堂：（白：得咗，得咗，點解亞哥仲唔出嚟呢下？） 玉堂：【慢板下句】十載雲窗，欲向青雲步上，驚聞奪產，偷怨繼母胡為。 者香：【慢板上句】兄弟本連枝，莫個因財失義，萁豆莫相煎，總是以和為貴。 玉堂：（口古：亞媽，未知有何訓示孩兒，還望告知一切。） 區氏：（口古：無錯啦亞玉堂，自從你父先遊之后，我就撫孤守節，將你兄弟二人嚟養育，而家你兩個都已成家立室咯，嗱！你亞媽等若風前之燭嘅喇，所以我希望，在今時此日，將你父遺下個啲家產公平嚟分配，以后各立門戶，理所當為。） 玉堂：（白：哦，乜亞媽，你主張要我倆兄弟分家咩） 區氏：（白：係啊） 瑞堂：（口古：係呢亞哥，亞媽要我兄弟分家，好有理由嘅，雖然亞爹剩落多少家財，但係坐食山崩啵，你知道嗎，幾年來食的駛的，到而家都幾乎起嗮底。） 志芬：（口古：大伯爺，本來唔到我講說話嘅，算我唔識講都講幾句喇，你就迷頭迷腦只曉得讀書而不事生產，難為亞瑞堂慘淡經營去做生意，做下蝕下，容乜易蝕嗮副身家呢，所以亞安人都主張分家呢個問題。） 者香：（白：哦，咁然則亞二少奶你都贊成分家咩？） 志芬：（白：當然啦！） 者香：【花下句】難逃我慧眼，怎掩飾奪產行為，忙相勸，勸夫你順水推船，莫為金錢破壞了倫常關系。 玉堂：【花下句】妻你深明大義，不愧是賢淑嘅嬌妻，亞媽，我自當把母命遵從，素知友悌。 區氏：（白：嘻嘻，係囉，咁至係 乖仔㗎，亞二家嫂呀，你快啲入去我個房，摞個首飾箱同埋個的田契屋契出嚟啦。） 志芬：（白：哦） 亮清：【花下句】可恨那不仁嫂氏，竟有奪產嘅行為。 玉芳：【花高句】望二叔把正義主持，以免佢偏幫個敗家仔。 亮清：【花下句】乖侄女你為人正直，我絕不偏袒你二兄與慈緯。 玉蘭：【花高句】芳姐你幫理不幫親，真是難能可貴。（白：參見伯娘） 區氏：（口古：亞二叔，你在府上納福，突然大駕光臨，還望告知原委。） 亮清：（口古：嫂，請恕小叔冒昧，呢個不速之客，無非為著參觀兩位侄哥分配家產而嚟） 區氏：（白：請坐喇，請坐喇）【白欖】你倆兄弟，分完田契分屋契，亞媽極公平，你兩個都係我嘅仔，呢幾年真係唔駛計，玉堂你讀書讀到懵閉閉，瑞堂佢為營商，本來佢算盤都夠密底，點知幾乎蝕嗮副家財，現在有數俾過你計，而家有數俾你計。

瑞堂：【小曲】田契，屋契，田契，屋契，分開駛， 玉堂：唔計，不計，唔講，不計， 志芬：你應該計，個個數應睇，當清計，數目原詳細，任你睇。 者香：唔計，此家財，亦有大眾駛 玉堂：數目求祈不必計， 亮清：問題，問題，問題，問題，有問題，錢未齊， 區氏：撞鬼咩 瑞堂：請睇，請睇， 志芬：請睇，請睇， 瑞堂：都起嗮底， 志芬：冇心虧 亮清：胡為 玉堂：莫提，莫提 者香：莫提，莫提 亮清：我有話提 區氏：你無謂提 亮清：心翳 區氏：（白：哼！佢倆兄弟分身家，關你乜嘢呈呀二叔，我唔須要你理啊，唔該你快啲返去，你扯啊，扯啦嘛。） 亮清：（白：你叫我扯） 區氏：（白：扯定啦，） 亮清：（白：哼！你個后底乸想刻薄大婆仔，亞二叔唔會旁觀袖手嚟放過你，亞玉堂，我同你告佢，幾大都同佢哋打官司。） 玉蘭：（白：唉吔，返去慢慢至算啦爹） 玉堂：（白：無謂霎氣喇，亞二叔啊，唔啱我倆公婆送你返去罷啦，嚇，唔好嘈喇） 瑞堂：（口古：弊囉，果個死人衰鬼二叔同佢出頭，如果打起官司唔係好蝕底。） 志芬：（口古：嚇我都你傻嘅，有錢駛得鬼推車喇嘛，只要你肯聽我嘅計劃，嗱，包你唔會一簣功虧。） 瑞堂：（白：哈，大人，你高見，你好嘢，的確好嘢）【花下句】多謝女孔明把錦囊傳授，大丈夫不怕立心虧。（白：立即做亞二叔一板至得）