第五場《還金》 存義：【二王首板】小英豪，【腔上句】銅拳鐵臂，種有旁身寶貝呢把雁翎刀，替天行道。濟貧劫富，闖遍江湖，遁跡綠林身為俠盜，扶傾濟弱，不把名利貪圖，在荒郊來剪徑，等待有肥羊，步到。 瑞堂：【長花下句】行得我氣嘈嘈，只為天將暮，最怕途長日暮遇強徒，呢躺帶埋百萬家財，準備過埠做闊佬，就算打跛只腳，都不用操勞，三妹就講義氣，我就講綽頭，所以同胞兄妹都各行各路。 志芬：（白：三姑娘自己攞賤啫，我哋唔好講佢囉。）【花下句】行得我花容失色，行得我汗透衣袍，愿加雙倍工錢，望佚力兼程趕路。 區氏：【白欖】唉吔行行我好辛苦，因為我年紀老，本來你哋到要坐山兜，我以為慳多個錢多個寶。叫聲好乖仔，好家嫂，毋須趕得咁辛苦，不若覓店房，等待天明再趕路，天明再趕路 瑞堂：（口古：係囉，我都贊成亞媽嘅主張，喂！你哋知唔知到呢咗近邊處有客棧路鋪。知唔知啊？） 甲伕力：（口古：呢道左右都冇客棧嘅啵，） 乙伕力：（口古：係囉，係囉，最近都要行五鋪路去到泰和市然后至有旅店歇息辛勞。） 志芳、區氏：（白：嘩！仲要行五鋪路啊！慘喇！） 瑞堂：（白：唏，都冇法㗎，行啦！）【三腳凳下句】行到腳起枕，逼住要趧前途，辛苦都要行埋，免致徘徊歧路。 志芬：本來有山兜坐，都係家姑你胡涂，只顧係慳錢，而家陪埋你辛苦。 區氏：你哋何必來怨我，辛苦都要登途，【花】我亦都腳痛腰酸，唉！你無謂怨我囉，好新抱。 志芬：（白：唔怨就假喇，我對腳都唔知幾痛啊，） 瑞堂：（白：怨，怨都冇法㗎，行罷啦，行罷啦） 存義：（白：哪里走，哪里走，快些放下賣路錢，否則送你哋魂歸地府。） 瑞堂：（口古：我，我，我，我哋冇錢㗎，大王你想發財唔該你向第的喇，我哋仲要趕住去好遠路途。） 志芬：（口古：望好漢貴手高抬，麻麻哋準我哋過路。） 區氏：（口古：你做下好心啦大王，可憐我伯爺婆幾十歲，我就永感你恩高。） 存義：【芙蓉中板下句】睇你哋行囊豐滿，點能瞞過呢個老江湖，伕力沉重嘅步聲，可知盡是金銀珠寶，問你要財抑或要命，此際劫運難逃。【花】若不盡獻金錢送你到黃泉地府。 瑞堂：（白：嘩！手下留情啊大王）【花下句】怕是佢睜眉突眼，揸住個把殺人刀，唉！一日都係唔肯山兜，偷怨亞媽佢指我行黑路。 存義：【長花下句】任你金也好，銀也好，此際好比羔羊逢猛虎，若無金帛劫難逃，任你皇帝駕臨亦須賣路，你等難逃我眼，是否愿往陰曹，若愛生命快獻金來，箱中不少金銀珠寶。 瑞堂：（白：嘩！乜雙眼咁利㗎） 區氏：【白欖】我哋真係冇，大王你咪斷估，我兒不過係小商人，焉有黃金和珠寶。我所講是真情，求祈收多少就算數，收多少就算數。大王 存義：【花下句】任人講盡千言萬語，怎能瞞騙草澤英豪。若要開殺戒，方可取金錢，你等可謂自尋死路。 瑞堂：休要動惱舉鋼刀 存義：火遮眼，徒令我怒。 志芬：命緊要，愿獻珠寶。 瑞堂：金錢盡舍買頭顱 存義：愿可獻命可保 瑞堂：（口古：大王，最好俾個人情，留番一半俾我哋謀生，幾大都講下數。） 存義：（口古：唉吔吔，你竟然敢討價還價，我先取你頭顱） 志芬：（口古：我夫一時情急，大王你何須動怒。） 區氏：（口古：都係唔好要個的嘢囉仔，俾佢喇，如果你有乜三長兩短，邊個捧我個香爐啊） 瑞堂：（白：仲好講，講乜嘢啊，成日都係你啦老鬼。）【花下句】唉，唔通我度人，人度我，肉刺到好惟拮咗我幾刀，無奈手震震，奉上大王，求你俾番多少盤川都好啩。（白：唉！大王，你抬嗮去都得喇。） 存義：你都算知情識趣，否則要血染鋼刀，銀十兩送你作盤川，快爬你路。（白：拿去） 瑞堂：（白：多謝大王） 存義：（白：你哋唔駛驚啊，我素來劫富濟貧嘅，每人送一百兩銀，你哋同我擔嗮的嘢返去啦） 眾挑夫：（白：多謝大王） 存義：（白：跟我起程） 者香：（白：亞哥，） 存義：（口古：義妹，你去洗衫咩，唔好洗住喇，同我返去先啦，因為我今日做咗一單好大單嘅生意啊，或者可成巨富。） 者香：（口古：係啊，咁就好囉，咦，乜個個櫳箱都寫住梅大成堂嘅 ，似乎係我夫家之物，令我大起疑狐。） 存義：（白：你夫家係梅大成堂咩？） 者香：（白：係囉，係 喇亞哥，你記否記得被劫人嘅相貌年齡啊？）

存義：（白：記得）【白欖】有個伯爺婆，有個大肥佬，帶埋個老婆，瓜子咁嘅面譜，路經此地方，我仲看透班挑夫沉重嘅腳步。知道里便必定有黃金，不妨開箱來探討。 者香：（白：真係箱箱都載滿嗮㖞）【長二王下句】你眼力超高，莫非循環有報，你所言人物未差分毫，老婦是我家姑一個是奴嬸姆，仲有一個不仁二叔，枉佢作為心勞，從來報應分明，善惡到頭，終有報。 存義：（口古：既然係你夫婿嘅家財，我自當珠還合浦。） 者香：（口古：亞哥，呢批家財既係為你所有，又何用璧還奴奴。） 存義：（白：千祈唔好咁講啊）【花下句】正喜物歸原主，愚兄不敢妄取分毫，我重義氣磊落光明，誰不知我是綠林義盜。 者香：（白：咁啊，咁就多得嗮你囉啵，）【花下句】惟是睹物思人腸更斷，不知何日會吾夫，半悲半喜半憂煩，鳳泊鸞飄心自苦。 存義：（白：亞妹，唔駛擔心嘅，即刻返去叫亞媽同你去靈光寺求神問卜喇，或者靈神庇佑，指點你夫婦團圓呢，都未定啊） 者香：（白：好啵，即刻返去啦） 存義：【花下句】但愿慈悲我佛，指點你迷途。